10 months 1 week old 的Tiger B - 我家有個百厭囝

Tiger B由9個幾月開始識爬, 到依家短短一個月, 發覺佢已經好free咁通屋去, 好似周圍巡視業務, 你去邊佢跟你去邊, 你唔去佢都要"裝"下, 所以每次關門都要睇下下面, 以免"甲"親佢。

近期佢仲大膽到擒上sofa或箱上, 攞嘢玩, 險象環生。

幾日之後, 又有新攪作, 就係將我哋D雜誌, 一本一本扔落地下, 然後, 連我部printer都想...

10個月已經咁百厭, 大D唔知點算.

2nd Wedding Anniversary

今日係我哋結婚2週年, 沒有特別在正日大事慶祝, 只有在昨日去了酒店食Tea Buffet, 仲要同家人(公公,婆婆和麻麻)一起, 另有一種特別感覺, 因為能夠齊齊整整一家人, 亦是一種幸福。

點解咁講? 這幾日發生的事令我有好大感觸, 如康泰事件, 無論死因研訊係點, 都無法改變事實, 親人不在就是不在; 日本海潚, 短短一日便家破人亡, 又有機會核洩漏, 影響更加深遠, 雖然我唔鍾意日本人, 但天災發生了, 都不再去諗什麼當年日本人點對中國人…。之後又聽到Kelly小產, 個心”那”住”那”, 孖女點都有5個月, 成了人型, 點解會話無就無…唉, 其實能夠齊齊整整真係不是必然。

嚕囌發完, 大家睇下昨日D相啦-->

你睇公公同Tiger B笑容幾一致

Tiger B影相時, 最鍾意舉起手...

今次D相只有Tiger B同公公婆婆媽媽, 因為麻麻唔想影, 爸爸就要負責影相, 所以無得上鏡 .

10 months old的Tiger B

10個月了, 在食方面, 整體上和9個月一樣, 都是3餐粥, 4-5餐人奶; 動作方面, 爬得好快(通屋爬), 小型障礙物, 已經欄唔到佢, 所以全屋的edge和corner位已經貼上防撞bumper防撞角, 坐亦好穩, 可以扶住物件企和行, 試過無扶住企, 可以維持幾秒。

牙齒長了第3隻, 可以發出很純正的mama, baba, 奶奶第叫聲; 喜歡食星星餅, 見佢喜歡望住大人食嘢, 所以我們有時會餵佢食幾粒白飯, 佢會識咀嚼後才吞。眼睛靈敏, 一見到remote, 電話又或是未見過的東西, 會第一時間攞, 然後九秒九放入口, 睇少幾眼, 都出事。  

不過最大進步是Tiger B學識聽指令和模仿大人, 例如我們叫拍手, byebye, 點蟲蟲和恭喜, 佢會聽指令做出相同動作, 當然要嚮佢乖的時間才會啦; 有次我們發出嗒嗒聲, 佢竟然即時模仿我們, 發出嗒嗒聲, 所以真係不可以睇少一歲以下BB嘅學習能力, so amazing!

以下就是我們即時拍下Tiger B發出嗒嗒聲的片段:-

另外, 發現原來Tiger B好鍾意音樂, 點解話”原來”?, 係因為Tiger B嚮肚入面果陣時, 一聽到音樂就唔郁, 我以為佢似爸爸一樣, 一聽到音樂就瞓, 所以對佢學音樂都無咪期望, 依家見佢一聽到音樂就會隨著rhythm搖身體, 又或是拍手, 好似好有musical sense, 咁我都有番D希望。

唔知係咪大個咗, 扭計和痴身(夜晚最痴媽媽)嘅情況越來越嚴重, 有時唔理佢, 佢會喊到面都黑晒, 理佢結果"種"到佢係唔係都喊。 由於聽到太多人嘅警戒, 話"種"小朋友得多好大獲, 依家都唔知點做好? 莫非要對佢忍心D絕D?

這個月Tiger B都有幾次病咗, 主要是傷風咳, 感冒流鼻水, 現在好翻8899, 睇完西醫後唔敢比太多西藥佢食, 怕有side effect, 所以買了猴棗散, 好似幾好, 食了兩日, 就將大部分痰嘔出來, 不過D天氣始終時冷時熱, 真係要好好睇實Tiger B。

另外, 上月尾又去了醫院覆診, 體重去到8.32kg ( 18l bs ), 身高74cm, 體重維持在生長線25%, 屬於細B, 不過身高是90%以上。 仍然需要抽血檢查, 因為有些肝指數屬於marginal, 下次覆診(1歲時), 希望報告一切正常啦。