千羽出世了

這幾天因8.23慘事令自己和全香港人悲傷後, 終於有件事令自己開心翻D喇, 就係老公的姪仔生了一個肥肥白白的女兒-千羽, 個樣勁似媽咪, 成個日本娃娃咁, 有3.74kg重, 比Tiger B出世時重差不多1kg呢。 當我抱千羽上手時, 以為係大隻, 但原來是咁細小, 這時才驚覺到Tiger B不知不覺間長大了很多, 而且我們的輩份亦要升呢了, 由原先叔嬸輩升做叔公叔婆輩, Tiger B都成為人哋阿叔喇, 唉...唔制呀...接受唔到...叫到老晒...

可愛的千羽

Yesterday was a sad day

如標題, 成個人都好sad, 點解昨晚會發生D咁嘅事, 嚮電視直播見到整件挾持事件發生, 見到班廢到無論的菲律賓特警, 重要關頭dup螢光棒, 你估開演唱會嗎? 只用大槌打難門窗, 結果成個鐘都開唔到道入口救人, 咁兒戲, 我只可以”媽媽聲”對著電視鬧, 而愛莫能助。陰謀論講句, 菲律賓特警同個槍手係自己友, 如果唔係見槍手開槍, 根本唔會擊斃佢, 何況人質不是菲律賓人, 當然愛理不理。

由於自己現在身份唔同咗, 已經成為媽咪級, 見到其中一個生還者梁太, 面對喪夫之痛之如, 同子女又生離死別, 感受最深及悲痛 。 我相信短期內都唔會去東南亞旅遊, 實在太恐怖了。香港政府應該做D嘢啦, 唔好樣樣嘢講經濟講平等, 對菲律賓咁好, 開放咁多賓賓來港, set好工資保障佢地, 速進佢地經濟, 倒頭來特首昨晚打電話去比菲律賓總統, 都無人so佢。

昨晚在facebook更得識領隊Masa Tse原來是我舊同事的二弟, 只有在fb留言問候, 而今早, 見到他的回覆話二弟已經不幸身亡, 並且在昨晚乘包機去了菲律賓善後, 個心更加不安, 在此希望他節哀順變, Masa 安息啦。

工人姐姐上班了

等了個多月, 工人姐姐終於上班了, 有人分擔了大部分家務, 我媽咪暫時可以輕易一下, 點解講暫時? 係因為見到很多朋友, blogger的工人姐姐做嘢很差, 所以都係保持觀望態度。

不過話時話, 工人姐姐開始上班都肯主動清潔地方, 抱BB的手勢幾純熟, 當我們換片片時會主動幫手, 最重要唔抗拒BB, 希望她可以繼續keep到落去。

雖然現在我和媽咪輕鬆了, 只需集中湊BB, 但始終多了一個陌生人嚮度, 真係好唔習慣, 一來錢財方面又要小心鎖好, 無謂引人犯罪啦, 因為平時我會好隨意將錢財首飾放在枱頭; 二來行出行入, 都會無咁free。

有時見佢做緊清潔, 想知道佢做得啱唔啱, 乾唔乾淨, 但下下check住, 又好似好唔信任咁, 都唔知點好, 始終將來要靠佢照顧BB, 難聽D講句, 條肉參嚮佢度, 對佢唔可以太差。 所以將心比已, 都是採取一步一步咁慢慢同佢講出我哋D要求, 同對佢好D, 等佢唔好覺得我們難為佢啦。

3 months old 的 Tiger B - 與爸爸耍樂

現在的Tiger B最鍾意就是同人傾計, 仲越傾越大聲, 大家請睇片--->

3 Months old的Tiger B – 開始Plan好未來

話咁快Tiger B已經3個月大, 為了培養他有儲蓄習慣(雖然早咗D), 我幫他在銀行開了個saving account, 將他出世時親戚朋友俾的利是, 以及將來每年的利是錢儲存起來,  然後再為他買了一份儲蓄保障計劃, 作為教育基金, for佢將來18歲後讀書時用的, 雖然唔算係好多, 都希望Tiger B明白我們的心意, 將來要好好讀書, 做一個有用的人啦。

2010 BB展

之前一直未去過BB展, 今期會展攪(聽人講比較大型), 當然唔放過啦。 於是我們上星期日中午到達會場, 一到會展感覺沒有想像中多人, 我們好快便買到入場票, 不過coupon要另加錢買就覺得幾搵笨。 我們行了一個多鐘, 人便開始多了, 於是我們集中火力, 行想買的counter, 最後用了接近1千買了一些心頭好。

由於Tiger B開始喜歡周圍望, 所以買了Fisher Price吊鈴給他.

Memory station立體手腳模, 份量可整到2手2腳. 想買好耐, 希望成功整到.

思詩樂清潔綿4包, 用後覺得好用, 所以再入貨.

2 months 4 weeks 的Tiger B - 百日宴

星期六, 我們為Tiger B舉行了百日宴, 這個是我們早一日訂的蛋糕, 味道都ok.

早半場, 我們本想同Tiger B影相, 然後才切蛋糕, 可惜Tiger B叫極唔醒.

開席前, Tiger B終於醒了, 我們即時同他拍照.

2 Months 3 Weeks 的Tiger B - 我可以抬頭了

見Tiger B每天都有好大嘅變化如識得"e e ar ar"同你講嘢, 手仔摸物件和眼仔跟著你轉動, 現在更加可以抬頭了, 總覺得好amazing.