7 months 2 weeks old 的Tiger B - 掌上壓

7個月BB掌上壓大家睇過未? 大家睇片--->

一則恐怖的新聞

星期六睇到一則新聞, 講D傭工帶少主賣淫, 嘩...實在太恐怖, 令到我好驚, 一來自己對工人姐姐已經無咩信心, 二來周不時都有D唔好嘅新聞出黎, 不過最多是對少主差, 未致去到里D地步, 會影響小朋友一世嘛。

我睇完新聞後, 有理無理, 即時同我工人姐姐講, 當傾下計和畀佢有D警惕, 佢即時同我講佢哋信穆斯林, 唔做里D嘢, 唉...發生單事咩一樣係印尼人。

依家我會好留意Tiger B情緒變化, 唔怕一萬最怕萬一。 

 

extracted from東方日報

傭心難測 帶少主賣淫案

本港過去曾發生多宗外傭性侵犯少主或帶少主賣淫案件，其中○七年便揭發有外傭帶當時分別三歲及五歲的兩名女少主賣淫。三十三歲外傭為貪圖每次收取二百至五百元酬勞，於○六年三月至○七年七月十六個月內，五度帶兩名女少主往紅磡黃埔一遊樂場內被人非禮。

貪圖薄酬 強迫賣淫

直至遭性侵犯的女童被父親帶她們到同一間遊樂場玩耍時，表現慌張，在父親追問下才揭發印傭帶兩人賣淫事件。而受害女童不但被人帶入黑房脫光衣服舔身體，亦曾被硬物插入肛門。涉案印傭承認五項協助教唆非禮罪，被判監三十二個月。

另外，四十五歲外傭亦被揭發與十三歲男少主交歡。○七年八月只有十三歲的男少主與外傭一起觀看互聯網色情片段，外傭其後與男少主發生性行為。三個月後，兩人在家中看過色情片後，再次發生性行為。○八年一月，外傭又以呻吟聲引誘男少主口交。男少主事後希望終止該種關係，於是告訴教友，事件被曝光，外傭最後被判囚五個月。

7 months 1 weeks 2 days old 的Tiger B - 識自己企起身

好興奮呀, Tiger B又學識新嘢, 就係自己企起身。

記得上一篇blog都仲係講緊佢開始企得穩, 不過仍然要人扶住, 有嘗試企起, 但不成功。

今朝, 工人姐姐叫我快 D去睇, 話Tiger B自己扶住床邊企起, 於是我攞起相機, 就拍了以下的重要moment. 

這條片是我早幾人拍的, 仍然是要人扶住企起先, 然後企得穩穩時拍, 你睇Tiger B幾開心.

7 months old的Tiger B

7個月啦, 時間過得好快, Tiger B已經長大不少, 開始有自己的character, 有自己意見, 識得唔鍾意就發皮氣, 知道我哋明白佢想點, 就好開心, 雖然係咁, 我仍然懷念Tiger B出世時, 成個麵粉團, 任我哋搓圓禁扁的日子。

依家Tiger B識得好多嘢, 反身(不過只有一個方向)已經難唔到佢; 坐已經算幾穩鎮; 開始試圖學爬, 雖然仍未成功, 不過肚仔patpat可以離地了, 暫時只識向後移; 企方面, 有人扶住可以企定定片刻, 有幾次試過握住物件站起; 講嘢方面, Tiger B已經唔單純發單音, 會不時發出不同的語句和唱歌仔, 例如吾媽, 吾制…而且識叫人(初頭都唔為意), 每當佢想draw 人 attention時, 就會向住人叫hey, 直到有人應他為止, 所以這個月都有好多驚喜。

仲有, Tiger B好鍾意睇電視, 尤其是有小朋友的廣告如A+, Friso和pampers, 佢會專心眼定定地睇, 直到做完為止, 我哋嘗試用佢鍾意嘅玩具引開佢, 通常都唔成功, 所以我哋好肯定confirm佢係一名廣告電視精; 另一樣可以吸引佢坐定定的, 就係電話, 佢好鍾意聽人講電話, 有時我哋會開speaker phone, 比佢聽埋一份。

食方面, 我嘗試幫佢戒夜奶, 頭4晚佢不停起身ee ar ar, 我只會抱起安撫直到佢入睡, 原以為可以成功, 到第5 晚, Tiger B不再ee ar ar, 反而起身大喊, 我仍然堅持無餵奶, 直到第2 朝見Tiger B聲音沙啞, 開始有點不忍, 於是到第6 晚, 當佢大喊, 我知道無法唔再次餵夜奶了。當初我係有點唔開心, 覺得Tiger B咁大個仔, 點解咁唔叻, 戒唔到夜奶, 不過諗深一層, 其實佢每次埋身食夜奶都食好多, 不似心引(當我係人肉奶咀), 所以我估是他有身理需要多於心理需要, 就唯有等佢大D自然戒掉啦。

至於日頭, 有兩餐固體--粥仔, 依家可以食到一碗了(當中由抗拒食固體 (粥仔)到可以食到一碗, 又係另一個辛酸故事, 在這裡不詳細講了), 而且已經試了不同種類, 但食魚粥, 好似有D敏感(不知是天氣問題或是魚的問題, 面仔突然起濕診), 所以暫時停止, 會到8-9個月才會再餵魚粥, 其實之前都有聽兒科醫生講過, 魚可以致敏, 適宜9個月以上大BB食。 水和生果(除了蘋果)都是Tiger B的至愛, 算是我唯一(在食方面)覺得有D安慰。

除了兩餐粥仔, 還有3~4餐奶(每餐3~5oz), 其中3餐通常是媽媽奶, Tiger B實在太鍾意食媽媽奶, 尤其是埋身食, 最抗拒是食奶樽, 除非我唔嚮屋企或躲埋一邊(每次有人同我講, BB千萬不要食奶樽, 否則不食人奶, 我一定同人講, 不是絕對的, Tiger B就是一個好例子), 所以餵奶粉和粥仔的工作都係交比工人姐姐做, 唉…都有D無奈。

下個月, 相信Tiger B應該會學識爬行, 站立..., 相信會帶給我們更多驚喜, 現在期待中...

你睇我係咪大個咗, 可以玩鞦韆喇!

睇清明上河圖

早響上海expo中國館展出清明上河圖, 我哋已經好想去參觀, 奈何Tiger B出咗世無耐, 無辦法離開Tiger B去旅行, 所以現在難得香港有機會睇到, 我哋一定唔會放過, 昨日我哋就請咗假帶埋Tiger B, 婆婆, 麻麻, 工人姐姐一行6人去睇清明上河圖。

今次算係Tiger B第一次出遠行, 我們順道去了迪迪尼(只係門口, 呵呵.., 留待Tiger B大D才入去玩)和去迪欣湖影下相, 原來迪欣湖唔嚮迪迪尼站附近, 要行上20~30分鐘才到達, 本來可以乘巴士到達, 不過要等20分鐘, 所以我們決定步行, 沿途D indication其差, 差D行錯路, 反觀迪迪尼就做得好好, 所以去到迪欣湖不難想像到遊客的人數會少得可憐(雖然係weekday), 不過都見到3對新人嚮度影pre-wedding photo.

到下午我們才到展場睇3:00-4:00 section的清明上河圖, Tiger B因為太攰, 全程瞓著咗, 到我們離開才瞓醒。

非常精彩的清明上河圖, 我們不停影相和拍video

由於帶了Tiger B整日出外,打亂了Tiger B的食奶時間, 結果佢比平日食得更加少(全日加埋都無5ozs), 令我非常擔心, 而且果晚瞓覺, 不停扭計, 一放落床上, 即刻要返轉身, 被他折磨了一晚, 才知道他原來想爬嚮度瞓(從來未試過爬嚮度瞓), 我見他識將頭仔打側呼吸, 才敢比他繼續, 因為Tiger B仍未識返翻轉個身, 怕會有危險, 所以當他一發出依依聲音, 我即刻幫他返翻轉, 就咁這一晚就無覺好瞓了。

下次有機會帶Tiger B整日出街, 睇怕要考慮得清清楚楚。  

6 months 2 week old的Tiger B – 電眼男

Tiger B近日又有新招式, 就是向人咪起雙眼笑, 作為佢媽咪嘅我, 當然比佢電暈, 唔知其他人見到, 會唔會比佢電暈呢? 呵呵呵…

上次講到Tiger B對D啤梨蓉好受落, 之後再俾佢試, 態度180度改變, 變得好抗拒, 個面口仲”喇”埋一舊, 再一次証明Tiger B好嘴刁。

另外, 我哋希望Tiger B飲多D水, 所以買咗隻Avent 2號學習杯比佢自己飲水, 依家Tiger B仲未識用, 只係當隻杯個鴨嘴係牙膠多過係飲水杯.

此外, 我哋又買咗healthy time嘅牙仔餅比Tiger B食, Tiger B好似幾鍾意食, 不過真係要睇緊D佢食, 因為D餅食食下會溶, 好易"勤"親, Tiger B試過, 嚇c我呀!

6 months 1 week old 的Tiger B - 食啤梨蓉

嘗試了米糊, 不同的粥, 始終提不起Tiger B的食慾, 今次嘗試啤梨蓉, 終於肯食喇!

另外, 我為Tiger B整咗隻4~6個月嘅music slideshow, 大家得閑黎睇睇啦~

6 months 3 days old 的Tiger B - 提早感受聖誕節氣氛

聖誕節氣氛開始來臨了, 屋企樓下的商場, 已經佈置了聖誕嘅decoration, 主題係precious moment, 於是我哋帶Tiger B去影下相, 等佢提早感受下聖誕節氣氛, 到遲D再帶佢去尖沙咀睇燈飾。

睇翻D相, 才發現我哋原來好少全家幅相, 日後真係要影多D喇.

條揹帶是Tiger B的至愛, 我哋一攞出黎, 佢就會好興奮-->因為佢知道有街街去嘛.

****************************************************************

今朝早返工前, 婆婆將Tiger B放在吹氣座椅上, 我見佢坐嚮度不停唱歌仔, 自得其樂, 於是忍不住攞起相機拍了一段video, 可惜到我拍了一會, 佢好快又開始不耐煩了。

***************************************************************

另外, 今日發生了一件好惱氣嘅事, 話說上班期間, 突然婆婆打電話比我, 話工人唔做嘢, 只係攬住Tiger B一齊瞓晏覺, 這件事唔係發生第一次, 每次我都同婆婆講:可以即時叫工人起身, 不過就係唔明點解婆婆只向我投訴又無直接叫工人起身, 仲忍氣吞聲幫工人做嘢,  所以某程度, 婆婆有D"種"工人, 所以婆婆向我投訴, 我有D"興"同愛莫能助, 不過最惱氣都係不滿個工人, 嚮我面前成日扮做嘢, 我唔嚮度就做自己嘢或打sms, 已經唔洗佢夜晚湊BB, 仲要日日瞓晏覺咁歎, 我一晚起幾次身餵奶咁辛苦都無得瞓晏覺啦, 如果唔係無工人唔得, 我一早想炒佢!

6 months 1 day old的Tiger B – 又到健康院檢查及打針時

Tiger B到咗六個月, 又要去健康院檢查, 今次主要檢查兩樣嘢, 第一樣係睇下佢雙眼有無斜視, 即是姑娘用物件引Tiger B, 如果佢雙眼能夠同時跟著物件移動, 就屬於正常, Tiger B當然做得到, 仲要一手將物件捉到實一實。第2樣要試係check下Tiger B腳力和坐得是否穩固, 哩2樣姑娘都話ok, 不過我覺得坐都係差少少, 始終唔可以無support又坐得好穩固。

而體重方面, Tiger B有7.41kg, 仍然係跟自己的成長線(25%)成長, 身長就無得度, 原來健康院規定度到4個月, 之後就要到2歲才會再度。

由於無需要在健康院打針, 免除了一次打3針的痛苦, 所以見完姑娘就走得, 在臨走前, 去排期擇日檢查。

到了第2日, 約了私家診所打6合1, Tiger B同往時一樣, 到打針時才喊, 打完已經忘記痛楚又笑笑口同我哋玩。之後果兩日都無發燒, 只是第2晚頭仔比平日熱咗少少有37度, 都算是正常。 到兩星期後再安排打第3支肺鏈, 就要到一歲才需要打針了。

6 months old 的Tiger B - 半歲生日喇

Tiger B 半歲生日喇, 我哋買咗個蛋糕仔同佢慶祝.

此外, 我哋仲幫佢參加了Huggies半歲BB生日會, 可以同好多同齡小朋友一起參加網上生日會, 都幾特別呀.

http://www.huggies.com.hk/eparty/campaign-party.php?accessKey=A752668EF7580ACCD5043E90&intYear=2010&intMonth=11&intDay=11

另外今日又有新嘗試, 就係食粥仔, 下午婆婆餵時都好接受, 不過到了夜晚再試, 已經無興趣了. 不過我相信粥仔多D變化同配搭, 應該會比米糊容易接受多D.

同場加演Tiger B最鍾意表演嘅噴口水, 我哋從來無教過佢, 就係唔知點解佢會識, 仲噴到我成面口水.

5 months 3 weeks old 的Tiger B - 為冬天作好準備

有見天文台預測, 今年的冬天會比往年寒冷, 而今年又是Tiger B第一年的冬天, 所以要為Tiger B在冬天作好準備。之前已提及要買電暖爐, 終於買了Delonghi 2500w 充油式暖爐, 不過暫時未有貸, 要下星期才送貸。

之後又聽人講用暖爐會好乾, 而且早一星期突然天氣乾燥, Tiger B面仔爆到七彩, 所以買了部加濕機, 希望Tiger B過一個又溫暖又舒適, 以及唔會起濕疹的第一個冬天, 所以你米話養一個BB 平, 為咗佢, 屋企多咗好多電器, 同交多好多電費(夏天要交$2XXX電費, 都幾肉痛)。

除了電器, 亦買了好多冬天衫仔, 一到Shopping見到好得意嘅衫仔, 就瘋狂去買, 自己D衫反而一D買嘅意欲都無, 所以覺得做咗阿媽唔同晒。

哩D係其中一部分。

Tiger B的近照, 我哋幫佢剪咗一個陸軍頭, 人都爽D.

又大個咗, 而且開始坐得好穩。

坐嚮度, "浪"起隻腳, 成個大班咁.

張sofa仔係咪好靚好colourful呢, 做緊promotion時買架, 只需$29.9, 超平!

5 months 2 weeks old的Tiger B - 好凍呀

Tiger B本身係一個好怕熱嘅BB, 食奶時有冷氣都會滿頭大汗, 所以一定要開行冷氣才可以入睡。 本以為入冬應該無有怕, 結果, 里幾日天氣凍咗D, Tiger B唔知係咪唔適應, 又可能是他第一次感受低於20度的天氣吧, 嚮夜晚經常醒和喊, 一定要扭抱才肯瞓。 我已經比好多厚夾衣比佢著, 基本上依家見到嘅Tiger B似一隻糉, 遲D再凍D, 唔知點好。

上個星期開始已經留意緊電暖爐, 不過實在太多型號, 牌子, 都唔知邊隻好, 實在好頭痛, 暫時心水的有Delonghi嘅充油式, 聽D sale講充油式會無咁乾, 又比較安全, 不過原來Delonghi嘅充油式都有好多model, 所以仍未決定到, 等我今個假日積極出去D電器舖搵下D資料!

5 months 1 week 的Tiger B

又係同爸爸玩嘅時間, 今次laughing gor上身, 不停哈哈笑, 媽媽見到, 即時拍低video留念:-

之前講到Tiger B唔知係咪有厭奶, 食奶方面好差。 到踏入第5個月, 開始有D改善, 依家有時可以食到5-6oz, 當然相對其他同期嘅BB仍然少, 已經好開心了。而且我睇過一D文章, 講到BB食量唔需要多, 否則會令BB長大後會偏肥, 反而少食多餐更能令BB吸收, 所以我無再嚮這方面執著了。

Tiger B係悟空?

星期日, 帶Tiger B落樓下商場逛街, 在lift裡面有一個3~4歲嘅小朋友突然指住Tiger B同佢媽咪講: 點解BB龍珠頭嘅? 需則童言無忌, 但我當時聽到好唔開心。

Tiger B約一個月大時, 可能是頭髮比較硬吧, 中間D頭髮長長咗就開始豎起,初頭媽媽都擔心將來唔知可以幫Tiger B剪什麼髮型, 但斷想唔到會因此而比人笑, 當諗到將來Tiger B 啲同學唔知會唔會以此笑佢, 同佢改花名, 就更加怕會傷害到佢弱小心靈, 後果可大可少。

諗翻自己做學生時, 最怕比人改花名, 當比人起D好難聽嘅花名後, 需則不致於唔返學, 但係一定唔好受。 不過比起依家D “港童”的確更加難處理咗, 一不小心教導, 就….唉, 好似最近有個Auntie, 個孫女小學讀Mary Knoll, 以為好好, 到今年升中學就開始唔肯返學, 做她父母的不敢打不敢鬥, 怕萬一好似最近D新聞咁, 個細路走去跳樓自殺仲大獲。

所以話做父母真不容易!

5 months old的Tiger B

Tiger B終於5個月人仔啦, 我哋無刻意同佢慶祝, 只係買咗D玩具比佢練習下手部活動, 同佢影下相留念。

講開影相, 我哋時不時都同Tiger B影下相, 拍下video, 之後會睇番Tiger B”細個”果時D相, 回味一番。 每次感覺佢的而且確是變化好大, 由當初面黃黃, 又瘦又醜, 到依家總算有D肉”地”和白雪雪, 而且都幾靚仔呀(每個父母都覺得自己個子女係最靚嘅, 呵呵…), 都算有D安慰。

依家嘅Tiger B, 幾神氣.

只有1個月果時, 原來又黃又瘦, 仲要經常去醫院檢查面黃, 媽媽睇番都好心痛.

依家Tiger B比起1個月前識多咗嘢了, 例如開始識認人, 公公少了時間探佢, 佢已經唔肯跟公公了; 當我經過佢眼前, 佢會好開心地向我笑, 如果我扮看不見他行開, 佢會即時喊起來, 到我走向他面前, 他又會即時笑翻, 如果抱起佢, 佢會攬到我好實, 好似好滿足咁, 這一刻媽媽個心當堂甜到流。 認物件方面, 我們通常將佢D玩具放在一個袋裡, 當我們拿到佢面前, 佢會好似認得咁好開心地探頭去望袋面的玩具, 然後伸手去攞; 佢一向唔鍾意食奶樽, 對奶樽好抗拒, 有次工人姐姐去攞奶樽, 佢離遠見到即時發晒皮氣, 所以唔可以低估佢嘅認知能力。

動作方面, 當我們買了play mat比佢嚮度自己活動之後, 便有好多驚喜, 佢一係反身扮飛機飛(手腳離地, 只有肚仔貼地), 一係瞓嚮度將身體卷起, 然後將個腳指公放入口食, 仲食得津津有味, 一係好似游背泳咁, 用腳推郁自己, 如果不留神, 佢唔知去咗邊。 仲有1個月就半歲了, 好期待, Tiger B再比多D新驚喜我哋。

食嘢方面, 我哋比Tiger B食咗2次米糊, 第2次將D米糊教杰D, Tiger B可以食到半湯匙份量(第1次只食到1,2啖), 都算是好嘅開始, 不過食奶, 仍然是我最頭痛的一環, 本打算餵人奶到6個月, 但以Tiger B咁抗拒奶粉的程度, 自己D奶量又開始下降, 都唔知點算,  Anyway, 就交比天去安排啦。

4 months 3 weeks old 的Tiger B - 厭奶期又或是反常期?

唔通BB到咁上下大就會有厭奶期又或是反常期? 現在真係好苦惱, Tiger B這星期開始日頭唔肯食奶, 就連最鐘意的埋身食都抗拒, 莫講食奶粉了, 更加抗拒, 反而深夜時分就肯食(都要埋身食), 而且食得好密, 基本上我係瞓兩個鐘又要起身餵奶, 令到我好攰好攰, 所以好快無人奶比Tiger B食, 但當我補奶粉, 佢又掂都唔掂, 發晒皮氣。就係咁, 之前摸Tiger B個肚仔肶仔, 會有D肉地, 依家就摸到骨"杉杉"

有試過襯Tiger B瞓著咗, 餵佢食多D奶粉, 令佢夜晚瞓長D時間, 而且可以飽D, 初時好似好work, 而且可以好快食晒, 但試多幾次, 佢好快知道唔係人奶, 佢又開始唔肯食。 

唉, 唔知有咩方法, 令Tiger B正常返呢, 唔知開奶茶有無用呢?

4 months 3 weeks old 的Tiger B - 玩"bu"口水

之前都有提過Tiger B唔知幾時開始鍾意玩"bu"口水, 他流的口水量已經很驚人, 基本上每2-3小時就要換口水肩一次, 否則會連衫都整濕, 現在加上他玩"bu"口水, 一不留神會比佢"bu"到成面口水, 真係唔知點解Tiger B口水會咁多, 會唔會口渴呢?

他飲奶已經唔多, 我又無俾水佢可飲 (因為聽醫院話BB唔需要飲水), 現在我要開始考慮比D水Tiger B飲下, 希望唔會因此而減低他的"食慾"啦。 

 

4 months 3 weeks old 的Tiger B - 第一次食米糊

不驚不覺Tiger B已經4個幾月大了, 見佢食奶量不但無增加, 而且有減少趨勢, 每餐最多4oz, 有時食2oz就收工, 比正常BB少很多, 而且佢開始經常全神貫注咁望住我哋食嘢, 便嘗試比啲solid food比佢食, 希望佢食多啲飽啲。由於佢未到6個月, 怕食粥仔和果蓉會容易敏感, 所以首先比1湯匙米粉+人奶mix成的米糊比Tiger B食。

根據instruction的份量1:3去mix, 感覺唔係好糊狀

開頭餵一,兩小匙比Tiger B食, 佢好似好有興趣, 心諗得米, 以為可以比一餐米糊Tiger B食, 取代一餐奶, 可能是新奇吧, 之後就好抗拒, 每食一口就吐一口, 食到一面都係米糊, 之後仲發皮氣, 結果我哋投降放棄了。

之後我哋有嘗試食小小米糊, 試下是否好難食, 令到Tiger B咁抗拒, 結果又無想像中咁難食, 相信是Tiger B未習慣吧, 等我過幾日再嘗試餵佢, 希望Tiger B可以好快接受啦。

4 months 1 weeks old 的Tiger B - 彈彈跳

Tiger B近日又有新招式, 就叫做彈彈跳, 每當我們抱起佢, 佢就會表演彈跳人, 如果無翻咁上下力, 都唔好同佢過招。

4 months 1 week old的Tiger B – 3D手腳模

見到好多父母為佢哋個BB做立體手腳模留為紀念, 自己都好想為Tiger B整, 於是嚮上個月BB expo買咗1 set, 仲即時滿心歡喜地研究點整點整, 結果整第一隻手便失敗咗, 好唔開心。其實已經跟足instruction, 但千算萬算卻算不到, Tiger B手仔放落倒模漿後, 因為水溫凍, 所以反應好大, 醒咗左郁右郁, 而且D倒模漿又好快凝固, 最後倒模獎泡湯。

之後多次想整, 都提不起興趣又或是忙碌無時間, 最後連Tiger B一百日(值得紀念嘅moment)都過埋都未整。 於是同自己講, 再唔動手, Tiger B隻手仔大D就做唔到, 會好浪費, 於是在Tiger B第4個月, 終於的起心肝去take action。

由於有上次的經驗, 知道突然將Tiger B隻手仔腳仔放落倒模漿會嚇醒佢, 於是重複又重複, 將Tiger B隻手仔腳仔放落水裡到feel下水溫, 等佢適應咗水溫, 就開始開倒模粉, 最後雙腳成功地整到個模, 但隻手有少少失敗, 因為Tiger B實在太sensative同醒瞓, 不過算啦, 第一次整係咁上下。

Tiger B隻手仔腳仔模

D手紋腳紋都好清楚見到

完成品 - not bad, 不過有點遺憾, 就是缺了一隻手

4 months old的Tiger B – 第2次打5合1

上星期六帶Tiger B去打5合1和口服輪狀病毒疫苗, 由於有上次經驗, 知道打完針, Tiger B有少少發燒, 所以都會細心留意佢嘅變化。好彩今次Tiger B只係夜晚有少少興, 體溫去到37度。但係之後果幾日就非常扭計, 尤其是夜晚臨瞓前和深夜, 昨晚更起4次身要食奶, 食少少又唔肯食, 捵來捵去, 比佢玩”謝”。

而且最近發覺Tiger B真係大個咗, 喊聲非常驚人, 以前夜晚最多”e e ar ar”扭肚餓, 可能見我拖得就拖唔多理佢, 依家有咁大聲得咁大聲, 冒必要我即刻理佢比佢食, 結果當然係佢勝利, 因為我唔想嘈醒全屋人, 所以依家每次Tiger B大聲喊, 我便會9秒9抱出佢。

除此之外, Tiger B唔知幾時開始由經常流口水, 到學識Blu水口, 一時冷不提防, 就會比佢噴到一面口水。

仲有, 發現咗Tiger B原來係一個去街精, 由於我們每次帶佢出街, 一定用揹帶揹佢(佢唔多鍾意坐車車, 可能視野無咁廣闊掛), 所以每次攞揹帶, 佢就會興奮莫名, 手舞足蹈, 大聲尖叫。

仲有仲有, 婆婆教識Tiger B”點蟲蟲”, 每當我哋一唱”點蟲蟲 蟲蟲飛…” Tiger B就識豎起2隻食指來點蟲蟲。

仲有仲有, Tiger B鍾意爸爸同佢講秘密, 係無媽媽份嘅秘密。 一講, Tiger B就會開心到咭咭大笑, 媽媽見到兩仔爺咁開心確實甜在心頭。

仲有仲有, Tiger B雖然未識轉身, 但係卻鍾意企, 最好抱住佢企+兩邊搖, 佢就會跟住腳un un 同搖擺。 

仲有仲有, Tiger B轉咗用M碼尿片了, 又大個咗lu~呵呵~

4 months old 的Tiger B - Music Slideshow

Tiger B 4個月啦, 變化可不少呢, 就等我將佢0~3個月的相片整成slideshow給大家欣賞啦。

報讀幼兒園

有一日, 同朋友講開湊仔, 佢同我講如果要報好D嘅幼稚園係時候開始搵了, 他的兒子7~8個月大時已經報了學校, 都係on waiting list, 我當時覺得簡直匪夷所思, 因為我一直以為九龍塘貴族名校才要早報名, 而阿仔又只得3個幾月, 於是我開始在網上搵區內幼兒園資料, 又參考別人意見, 最後搵了一間區內出名的幼兒園報名。

今日去了交application form, 院方同我講要等2年才有機會收電話通知約interview, 我心盤算: OK, fine等2年無問題, Tiger B剛好滿2歲可以讀N1, 之後院方再同我講, 現在輪後的人數有7百幾人, 而每年只收幾十人, 所以D位都好緊張。 我不禁嘩然, 同區有冇咁多同齡的小朋友, 仲要咁快排定隊, 似乎機會幾微, 只不過係一所區內出名D的幼稚園吧了, 實在太跨張。  

其實想深一層, 是否一定要報出名幼兒園? 自問真係唔想比個仔咁早有太大讀書壓力, 令到佢討厭上學, 我只要求佢有自主性, 有專注力, 唔好成為”港童”便可, 況且我哋都不是名校出身, 咪一樣讀到大學, 何必強求, 所以將來這間幼兒園收Tiger B固然是好, 若果唔收, 都不是好大損失, 我絕對相信每個人的資質已定, 反而最重要是心智發展和教小朋友分是非黑白, 這些都不是入名校(多功課及課程深)便學得到。 Anyway, 就順其自然, 點我都係想Tiger B可以開心快樂地成長。

3 months 4 weeks old 的 Tiger B - 醫院覆診

Tiger B啲黃雖然退了, 但醫院仍然需要我們帶佢去覆診跟進, 因為Tiger B個case是直接膽紅素值高, 有可能是肝膽問題引起。嚴重的問題經早期檢驗已經eliminate咗, 小問題仍要find out。

上月經已抽血, 今次主要是睇報告。 個醫生好nice, 一見到Tiger B就不停逗他笑, 然後比我睇報告裡面的數字, 再比對翻早期驗血報告的數字, 今次的數字確實"靚仔"好多(之前D數字比正常高幾十或幾百陪架), 全部回復正常水平, 醫生同我講應該是虛驚一場, 並建議我3個月後帶Tiger B再去覆診一次, 如果無問題, 就可以close file.

黎緊的兩個星期都會忙碌地帶Tiger B去打4個月的BB針(分兩次打5合1, 肺鏈和口服輪狀病毒疫苗)和去健康院身體檢查.

今次度高量體重record:

Weight : 6.3kg (我覺得體重比其他BB輕咗D, 但醫生話正常, 同頭圍一致)

Length : 65.2cm

HC : 40cm

 

Tiger B依家可以坐嚮度一陣子了

Tiger B最鐘意就是在我們的床上玩, 我媽咪話所有BB都鐘意上大人床, 包括我以前細個時.

見到我攞住部單反就成個人呆晒.

Tiger B似我?

由Tiger B出世到現在都唔知佢似邊個, 有人話似爸爸, 有人話似我, 不過大部分人都係話BB細個好難睇到似邊個, 咁即是暗示兩個都唔似啦, 但當我搵翻自己BB時D相比併下, 原來Tiger B啲眼神都幾似我呀, 咁我就當Tiger B似我喇, 嘻嘻...

千羽出世了

這幾天因8.23慘事令自己和全香港人悲傷後, 終於有件事令自己開心翻D喇, 就係老公的姪仔生了一個肥肥白白的女兒-千羽, 個樣勁似媽咪, 成個日本娃娃咁, 有3.74kg重, 比Tiger B出世時重差不多1kg呢。 當我抱千羽上手時, 以為係大隻, 但原來是咁細小, 這時才驚覺到Tiger B不知不覺間長大了很多, 而且我們的輩份亦要升呢了, 由原先叔嬸輩升做叔公叔婆輩, Tiger B都成為人哋阿叔喇, 唉...唔制呀...接受唔到...叫到老晒...

可愛的千羽