1 year 1 month old的Tiger B

踏入1歲後, Tiger B的確是有一大躍進。

在食方面, 2餐粥和3~4餐奶粉, 我可以功成身退, 不需要做人奶媽了(開頭有D depress和不捨), 我估Tiger B妥協唔食人奶, 可能是因為媽媽奶已經不足夠佢食, 所以令我意想不到佢能夠咁快戒了。 又由於可以食到奶粉, 而且越食越多(由初初3~4安到現在6~7安), 所以食粥方面可以由3餐減到2餐。另外, 至今仍然好鍾意食星星餅, 仲識用牙齒打開攞餅食。

在體重方面, 我沒有磅到, 但好明顯地, 面仔和肚腩仔脹了不少, 應該可以踏入2字頭磅數吧, 而且已經轉用大碼片片, 唔怪得D人話奶粉係肥仔水。

在睡覺方面, 在夜晚12點多餵完最後一餐奶, 已經可以一覺瞓天光, 我終於有覺好瞓了, 感恩。

動方面一樣, 已經行得好多步, 不過步履仍然似醉酒佬。

此外, 已經明白什麼是byebye, flying kiss, 點蟲蟲等, 同佢講, 佢會識做動作。

鍾意玩電話, 拿起電話, 識放在耳邊。

勁爛玩, 是爛玩仔一名, 一同佢玩, 就玩過不停。

極度痴身, 尤其是夜晚一定要痴我, 食飯和去街街痴爸爸, 一見到我哋換好衫或拿袋, 就知道我哋出街, 於是乎攬住我哋唔放。

牙齒已長出了7隻, 不知是否牙癢, 經常食手指, 磨牙。

同佢參加爬行比賽, 見佢平時爬得好快, 以為爬行比賽應該攞頭1~2, 結果意想不到, 佢竟然望住間隔唔爬果個BB, 笑笑口, 用佢至愛的星星餅引佢都唔爬, 畀佢氣死。

開始上playgroup, 第一堂, 無喊, 不過勁活躍和無心聽書, 可能太多未見過的物件和教材玩, 令我不知是否繼續上, 之後幾堂, 好似有D好轉, 但尚待觀察。